بهاء حجازي يكتب: خيرية أحمد ويوسف عوف والمادة الخام لخفة الدم

خيرية أحمد

“إلى زوجتي خيرية وابني كريم الذين لولاهما لجاء هذا الكتاب..افضل كثيرا”..

دا اهداء كتاب “هموم ضاحكة”، للمؤلف الكبير أستاذ ساعة لقلبك .. المؤلف يوسف عوف .. وزوجته خيرية هي زوجته الفنانة خيرية احمد، وابنه كريم هو ابنه الوحيد..

خيرية أحمد قصة وحكاية وحدوتة .. المادة الخام لخفة الدم في مصر .. جميلة بدون تكلف .. مضحكة بدون ابتذال .. مدرسة في الكوميديا .. مين يقدر ينسي مثلا الدويتو بتاعها مع فؤاد المهندس .. وجملتها العبقرية: “محمود.. انت ميت يا حبيبي”.. او لما حاول يكهربها.. فقالتله: “بس كدا هنستهلك كهربا كتير يا حبيبي”.. ولا الدويتو بتاعها مع اسماعيل ياسين فى فيلم “حماتى ملاك” عام 1959… لما كانت بتقوله يا خماسينو..

قصة جواز يوسف عوف وخيرية احمد واحدة من اغرب والطف واطول قصص الحب في الوسط الفني، ففي حوار مع الاتنين لمجلة الكواكب اتنشر في 16 يوليو 1963، قال انه اتعرف على خيرية في برنامج ساعة لقلبك، وكان بيرفض الزواج تماما، وشايف ان الزواج بيعطل الانسان، لكن وقع في حب خيرية بسبب صدقها وبساطتها وعلاقتها الصادقة مع من حولها.

اما خيرية فقال: “وإحنا مع فرقة ساعة لقلبك في الإسكندرية طلب يوسف إنه يعزمني على العشاء فوافقت وأثناء انتظار العشاء قمنا لنرقص فشعرت أنه يضمني إليه فضربته في صدره وعدت إلى القاهرة وكانت هذه الشرارة الأولى بيننا، واستمر هذا الحب ما يقارب 4 سنوات ولم يعلم أحد بعلاقتنا.

وقال يوسف عوف: “لم اشتر شبكة لخيرية أحمد بل اشتريت دبلة فقط حتى لم يتم ادون اسمائنا عليها، لاني ارفض جميع التقاليد, ودفع 25 قرش مهر بس .. ومش بمزاجه دا لانه اهلها اصروا انه يدفع مهر حتى من باب التفاؤل علشان ميبقاش فال وحش .. طيب هو مش معاه فكة .. فسلفته خيرية الربع جنيه .. ومرجعوش اصلا..

واتفق يوسف عوف مع خيرية إنه كان خايف ان الزواج يعيقه على الانطلاق وانه يعيش حياة الصلعكة اللي متعود عليها، لانه يحب الانطلاق وكان يسهر مع أصدقائه دائما يوم الخميس من كل أسبوع … صادف بقى إن زفافهما كان يوم الخميس ولما روحوا البيت, قال يوسف لخيرية إنه يوم الخميس، فقالتله: “طب روح لاصحابك وانا هستناك”، الغريب ان هو راح فعلا ورجع الفجر، وقال ان خيرية مكانتش متضايقة .. لانها تعرف عاداته وتترك له الحرية من أول يوم زواج.

اتنين فنانين يروحوا يقضوا شهر العسل في باريس.. في انجلترا.. لكن هما مسافروش برا .. سافروا الكويت .. ومش فسحة دي سفرية شغل كانوا مرتبطين بيها .. ومقالوش لحد من اصدقائهم هناك بخبر الجواز..

اتفقوا الاتنين اتفاق خلى مفيش مشاكل بينهم تقريبا، قالها الحاجات الصغيرة الراي ليكي فيها من غير ما ترجعيلي .. والحاجات الكبيرة ليا الراي فيها.. وضحك يوسف عوف إنه من حسن حظه أنهم لم يمروا بمسائل كبيرة… فكرني بنكتة .. واحد بيقول انا ومراتي اتفقنا رايي يمشي في الحاجات الكبيرة ورايها يمشي في الحاجات الكبيرة .. يعني هي اللي اختارت اسامي عيالنا ومدارسهم ومصروف البيت .. وانا الراي ليا في قضايا الشرق الاوسط والنزاع بين الكور*يتين .. والحاجات الكبيرة دي..

وقالت خيرية احمد عن يوسف عوف: ” زوج ديمقراطي جدا بلا طلبات باستثناء القهوة والشاي, وأثناء عملها يتحمل هو المسئوليات بدل منها وأحيانا كانت تواصل العمل 24 ساعة فكان يطلب منها أن تترك أعمال المنزل وترتاح”..

يوسف عوف مؤلف عبقري مخدش نص حقه .. كان بيشر خفة دم، يعني هو مؤلف قصة عايز حقي اللي عملها هاني رمزي في فيلم عايز حقي .. وهو اللي الف مسرحية هاللو شلبي.. وفيلم عالم عيال عيال .. ومسلسل ساكن قصادي من بطولة خيرية وسناء جميل .. وفيلم خياط السيدات لدريد لحام وشادية والجميل نهاد قلعي (فكروني اكتبلكم حكايته).. وفوازير المناسبات ليحيى الفخراني وهالة فؤاد وصابرين..

اتوفي يوسف عوف سنة 1999، وفضلت خيرية احمد بعد منه في عزلة وهدوء .. ولما رجعت عملت ادوار خفيفة منها دور الدادة في مسلسل الحقيقة والسراب لحد ما ماتت سنة 2011..

اللهم يرحمهم اجمعين..

#بهاء_حجازي